Your Fashion Personality | !؟ أعرفي ستايلك في عالم الموضة

فكرة التدوينة مرجع لتكتشفي ايش شخصيتك او ستايلك بالفاشن 
يعني زي الأختبارات الي تكشف شخصيتك تماما لكن بطريقة فاشونية تفيدك باطلالتك .
, و كيف يمكن ان تعرفي شخصيتك في عالم الموضة ؟ ليش شخصيتنا بعالم الموضة مهمه ؟ 
و الاجابه على هالاسئلة و اكثر راح تساعدك على فهم شخصيتك بعالم الموضة

لأنها من اهم الخطوات الي تحدد لك الصورة النهائية الي تظهري فيها امام من حولك .

بسم الله الرحمن الرحيم

السلام عليكم ورحمة الله وبركاته

مع بداية السنة الجديدة 2015 ان شاءالله راح تكون بداية حلوة عليا وعليكم 
و لأن قررت ابداء في تلبية رغباتكم بأني اطرح مواضيع تحتاجوا تعرفوا عنها بين كل فترة و فترة
 فـ هذا الموضوع موجه للجميع و ماهي محصورة في اشخاص , او اذاوق , او موسم معين 
بالعكس راح يكون فكرة التدوينة مرجع لتكتشفي ايش شخصيتك او ستايلك بالفاشن 
يعني زي الأختبارات الي تكشف شخصيتك تماما لكن بطريقة فاشونية تفيدك باطلالتك .

التدوينة راح تكون اجمالاً عن :
كيف يمكن ان تعرفي شخصيتك في عالم الموضة ؟ ليش شخصيتنا بعالم الموضة مهمه ؟ 
و الاجابه على هالاسئلة و اكثر راح تساعدك على فهم شخصيتك بعالم الموضة
لأنها من اهم الخطوات الي تحدد لك الصورة النهائية الي تظهري فيها امام من حولك .

’ اول شيء لازم نفهم تعريف الشخصية ؟! 

الشخصية يعتبر لفظ عربي مشتق من فعل الشخص 
بما يعني ان الي يحدد الشخصية هي افعال ناتجة عن عادات و سمات و خصائص و دوافع ..الخ 
يكتسبها الشخص من الظروف المادية و الاجتماعية الي حوليه و يمكن جدا ان تتغير شخصية الفرد 
بمجرد ما يتغير الظروف الي حواليه حتى لو يعتبر تغيير بسيط الا ان يحدث فرق بالشخص 
عشان كذا نلاحظ البعض فينا لما كان طفل شخصيته اتغيرت لو بجزء بسيط فيها بمجرد ما صار اكبر بالعمر
 لأختلاف ظروف الدراسة كـ ابسط تغيير ممكن يمر فيه .

’ ايش هوا الـسـتايـل ؟!

الستايل هو شكل الشخص العام بعد ما نسق اطلالته من اكسسوارات وملابس و شعر .. الخ 

و هي تعتبر لغة تعبر عن الشخص بدون مايضطر لانو يتكلم و ويوصف حاله للناس 

يعني من خلال ستايل الشخص الناس راح تعرف 50% الى 80% عن شخصيته بدون ماتتكلم معاه .

لأن اذا لاحظنا اساس " الستايل " يعتمد اعتماد كلي على " شخصيتك "

لأن شخصيتك تكونت من خلال عوامل مادية و نفسية 

فـ بالتالي لا محالة راح تأثر بشكلك الخارجي و اسلوب حياتك لأن كلها معتمدة على " ذوقك الشخصي " 

يعني بالنهاية ذوقك يتأثر من شخصيتك لان نظرة و ذوق الشخص للي حولية يعتبر ناتج عن تكوينه 

- و هذه معادلة الي ينتج عنها الستايل غالباً :

[ شخصيتك => يكون ذوقك => بالتالي يتكون ستايلك الظاهر للجميع ]

فـ ممكن انتي تشوفي ان ملابس الرسمية جميلة لأن شخصيتك تميل و ترتاحي فيها بمحيطك 

بس غيرك يعتبرها مثل السجن يقيده عن راحته و ان يبرز افكاره وذوقه و مو مناسب لمحيطة ايضاً .

يعني لو اختصرت الكلام الي فوق راح نعتبر ستايلك هي " مرآة عاكسة عن ما بداخلك "

و مع ان دائما في اتجاهات من الموضة الاغلبيه يمشوا عليها مهما اختلفت استايلاتهم 

الا ان كل شخص سبحان الله لو طريقتوا الخاصه بان يتبع اخر اتجاهات الموضة و يطبقها باسلوبه 

و رغم هالشيء للأسف الا ان في ناس يستنسخوا ستايلات غيرهم بشكل مرعب

 لدرجة تمسح هويتهم الي تميزهم !!

وماعتقد في احد مايحب يتميز لو بشيء بسيط لان هالشيء راح يبرز الشخص عن الباقي و يخلي الناس تفهمك 

و اقصد التميز اكيد بطريقة جيدة مو تميز باللفت الانظار ع اي شيء ممكن لا يتناسب مع شكل الجسم او المكان او السن .

’ ايش رابط الشخصية و الستايل بملابسي أو اطلالتي بشكل عام ؟!

كلمة " ستايلك " هي مصطلح مختصر من جملة  " شخصيتك بعالم الفاشن "

فـ اكيد عالم الفاشن لو مصطلحات زيوا زي الطب و الهندسة .. الخ
يعني مو من المعقول تروحي تقولي انا نوع شخصيتي بعالم الفاشن بوهيمية ليش تصعبيها و تقولي جملة كاملة
 ممكن تعبر عنها مختصر مفيد الي هوا " ستايلك " 
فـ بالتالي بدال ماتقولي انا نوع شخصيتي بعالم الفاشن بوهيمية => انا ستايلي بوهيمي فقط !

’  ايش هي العوامل الموثرة على نوع شخصيتي أو ستايلي  بعالم الفاشن  ؟!

العوامل الي تأثر على شخصية الفرد و الي بالتالي تأثر على شكله  الخارجي  " ستايله " هي :

- ثقافته و تعلمة و عملة .
-  المحيط و المجتمع الي حوليه .
-  اسلوب معيشته و مكانته الأجتماعية .
-  .... ألخ 

يعني حتى لو الأشخاص الي يحبوا يستنسخوا غيرهم هذا لايعني ان مالهم شيء
يعبر عنهم او مالهم عوامل مؤثرة حوليهم
بالعكس اذا دل فهو يدل على ان هالأنسان يحب يكون تابع لأي شيء
 و مايكون له تفكير و اسلوب خاص فيه  !!

و هذا ناتج من العوامل الي حوليه سواء كمحيط او تربية او ثقافتة
هي الي علمته يصير تابع غير عصامي يكون نفسه بنفسة 
عشان كذا يفضل الواحد فينا يبتعد عن هالشيء لان يعتبر من اسواء الأمور
لأن  راح يضر بشخصيتك و ثقتك و صورتك امام الناس
يعني ماعتقد حلوة بحقك احد يقول " والله هذه بس تقلد , هذه دايما تجري ورا الصرعات " 

طيب ما كلنا نجرب الصرعات بس كل واحد باسلوبة و قدر يحقق التوازن
 بين انه يجرب شيء جديد لكن بطريقة تضيف له شيء جمالي مو تمسح هويته الي تميزه  .

’  ايش هي اهم الأشياء الي تسهل عليا معرفة ستايلي  ؟!

هذه اكثر نقاط ينصح فيها الخبراء لما الواحد يحب يعرف هوا يندرج تحت أي ستايل او ايش هي شخصيتوا بالفاشن :


-  اعرفي شخصيتك هل انتي جادة او خجولة او مرحة .. الخ 

-  اعرفي شكل جسمك .

-  الوانك المفضلة لأن الألوان تعبر عن شخصية الانسان و مزاجه سبحان الله لدرجة
تم تصنيف علم متخصص فقط بالالوان وهذا دليل ع اهميته .

-  اعملي جولة تقييمية سريعة على دولابك وشوفي القطع الي عندك تميل لأي ستايل 
حتى لو كان معظم دولابك قطع بيسك هذا يعبر عن شخصيتك ايضاً فـ حطي هالامر بالحسبان .

- اسالي الي حوالينك  و أي ستايل دايما تحبي تلبسي , حتى ميولك للاعجاب بمظاهر
بعض النجمات او الفنون او بعض النشاطات.. الخ راح يعرفك كثير بستايلك
لأن ميولك و الأشياء الي تحبيها تاخذ 50% من شخصيتك فـ بالتالي راح ياثر
 بصورة كبيرة على نوعية ستايلك الشخصي .

’ هل الكلام السابق كله ضروري افهمه  و ليش لازم اعرف ايش ستايلي ؟!

اذا عرفتي ستايلك كوني اكيدة 100% راح ترتاحي بكل شيء تلبسي او تعملي باطلالتك اجمالاً

و راح يسهلك تختاري و تنسقي اطلالتك بكل بساطة من غير ما تحتاري و الاهم ان راح يعبر عنك و يميزك .

- يعني راح يقضي تماما ع الجمل المشهورة عند البعض : 

" حاسه كانوا مو انا , انا ماني مرتاحه حاسه في شيء غلط , ليش دايما الناس تقول عني مكبره نفسي , ليش مايطلع عليا زي فلانه حلو "

الجُمل الي فوق كلها طلعت بسبب عدم خبرة لا بستايلك ولا بشكل جسمك ولا بالألوان الي تناسبك كمان

يعني اساس الاشياء المهمة ما عندك خلفية عنها كيف تبي تحققي التوازن بشكلك

 وتحققي جزء لو بسيط من الكمال بالمظهر ؟!

عشان كذا الستايل مهم و مهم تعرفي ايش يعني كل ستايل و انتي أي نوع من هالستايلات 

لان باختيارك للاستايل لازم تعرفي ان الناس راح يوصلها رساله مين انتي

من ستايلك و شكلك الخارجي فلازم نختار ستايل يتناسب معانا عشان مانقول ليش الناس تفهمنا غلط 

و ثبت ان اللغة الغير اللفظية اقوى شكل من اشكال التواصل 

, فـ ليش مانكون اكثر وعي حول الرسالة الي توصلها ستايلنا الشخصي ؟!

[ انواع الشخصيات أو الستايلات بالفاشن ]

طبعا الستايلات كثيرة و انا عارفة ان البعض متعود ع كلام المجلات المعتاد 
و يحصروا بس في 3 او 4 ستايلات و الي كنت انا دائما ولا واحد فيهم لوول 

بس لما نجي جديا نلاقي الستايلات اكثر بكثير و تصنف بالنهايه تحت شخصيات معينه
 تتصف انها تميل لبعض الاستايلات او تتميز بمظهر معين الي تعكس هالشخصيات بالنهاية  
وراح تفهموا فكرتي لما تشوفوا الشخصيات و الستايلات المرتبطة فيهم
 و على فكرة التصنيف و الترتيب غير عن المعتاد 
فـ ممكن التصنيف يكون جديد عليكم لكن الاهم انو الكلام  صحيح
و انا هذا اسلوبي او الترتيب الي احبه :

لـكن !! قبل ما ابداء اتمنى لكل وحدة استفادت من التدوينة 

بليز لاتنسوا تشاركوني ايش هي شخصياتكم أوستايلاتكم  بالفاشن

 اسفل التدوينة او على التويتر @Ashwaq_Kh 

[ Classic  | كـلاسـيك  ]

يتصفوا غالبا بـ : بسيطين جداً - لا يحبون لفت الأنظار بكل وقت

 - لا يغيرون نمط لبسهم او حياتهم الا نادراً - لا يحبون المجازفات حتى وان كان باطلالتهم .

يتميز هذا المظهر بـ :  يميلوا للأساسيات بالملابس و الالوان المحايدة و الباهته بعض الشيء 

– لا يحبون اللمعان بملابسهم غالباً - لا يميلوا الى كثرة الأكسسوارات و يحبون الأكسسوارات الناعمة 

’ يعني بأختصار تفتكروا التدوينة للأساسيات : 

Wardrobe Essentials | اساسيات يجب ان تكون في خزانه ملابسك !!

هما اكثر ناس يقدسوا القطع هذه و دائما يبدعوا بتنسيق الأساسيات يعني باختصار يحبوا القطع 

الي لها اكثر من تنسيق .

 : Style Icons 

Reese Witherspoon - Miranda Kerr - Elle Macpherson 

[  Ladylike  |  الليدي لايك او طاغية الأنوثة  ]

يتصفوا غالبا بـ : متطور - متزن - متمكن - نشيط - محبوب

- قيادي - يهتم جدا بصورته امام الاخرين .

يتميز هذا المظهر بـ : يميلوا الى الالوان الفاتحة و الملابس المتناسقة بالالوان بما يعني

 لايحبون كسر اطلالتهم بالوان قوية - يميلوا في اطلالاتهم الى ابراز الأكسسوارات 

- دائماً ختياراتهم بين الفساتين و التنانير و بناطيل ذات الخصر العالي الذي تبرز انوثتهم - يحبوا الاقمشة الناعمة خصوصاً في فساتين المناسبات و يحبوا طبعات الزهور

 و النقوش الصغيرة الناعمة .

 : Style Icons

Kate Middleton - Dianna Agron - Emmy Rossum

[   Sporty Or Casual  |  رياضي و عملي  ]

يتصفوا غالبا بـ : بسيط , غير مبالي , بارد , يهتم براحته جدا , هادئ , متمهل .

يتميز هذا المظهر بـ : يحبوا الملابس الواسعة - يقدسوا الدنيم او الجينز في ملابسهم

 - ذوقهم بشكل عام شبيه بالكلاسيك ستايل و يميلوا الى الالوان المحايدة او البارزة مثل الاحمر 

- غالبا اختياراتهم في البلايز تميل للتي شيرتات و البلايز ذات طبعات

و لايحبوا الاكسسوارات الكثيرة في اطلالاتهم و غالبا تكون ذات تصاميم ناعمة .

 : Style Icons

 Cameron Diaz  - Cara Delevingne - Jennifer Aniston

[  Minimalist  |  اناقة البساطة  ]

يتصفوا غالبا بـ : الاتقان - متواضع - بسيط - رقيق - واضح - غير متكلف .

يتميز هذا المظهر بـ : يميلوا الى الستايل  الكلاسيكولكن غالبا يعتمدوا

على تصاميم بقصات حديثة ومبتكرة - يميلوا الى الالوان المحايدة

و الالوان الحيوية الفاتحة عكس الفاقعة و يعتمدوا غالبا في اطلالتهم ابراز لون واحد فقط 

مثل اللون الابيض الغالب على الاطلالة او اللون السماوي

او كسر الالوان المحايدة بلون حيوي مثل الاحمر  - لايميلوا للاقمشة ذات الطبعات كثيرا و يميلوا الى الاقمشة الخالية من ايت رسومات و الجينز  .

 : Style Icons

victoria beckham - Gwyneth Paltrow - Emma Stone

[ Bohemian  | الغجري أو الهيبيز ]

يتصفوا غالبا بـ : استقلالي - فنتج او عتيق – غريب الاطوار او خارج عن المألوف  – شاعري احيانا .

يتميز هذا المظهر بـ : غير تقليدي او " Funky " , يهتموا باكسسوارات الرأس او الشعر 

, يحبوا الطبعات المختلفة بالملابس , يميلوا احيانا الى الملابس و الاكسسوارات الفنتج , 

يميلوا للدمج بين الالوان الهادية و الزاهية يعني يكسروا بالالوان .

 : Style Icons 

 Kate Moss - Nicole Richie - Rachel Zoe

[ Dramatic Or Bombshell  | دراماتيكي و متأنقة جداً   ]

يتصفوا غالبا بـ : واثق من نفسه جدا - يحب ابراز محاسنه و التأنق

- مثيرين لفضول الي حولهم - يتصفون بجاذبية عاليه .

يتميز هذا المظهر بـ : يميلوا للملابس الي تبرز تقاسيم جسمهم خصوصا الخصر

 , يحبوا الطبعات و الالوان الجريئة , يميلوا لأضافة بعض اللمعات سواء باللباس

 او الاكسسوارات باطلالتهم , يحبوا يتأنقوا حتى بالاطلالات الكاجوال و الرسمية .

 : Style Icons 

 Blake Lively - Jennifer Lopez - kim kardashian - Marilyn Monroe  

[ Eccentric  | غير تقليدين  ]

يتصفوا غالبا بـ : مرح - مستقل - فريد من نوعه سواء بالافكار او الأطلاله - لايخاف المخاطرة و غالباً يكون شخص عنده حس فني و يحب التغيير كثير .

يتميز هذا المظهر بـ : متغيرين باطلالتهم - جريئين باختياراتهم و لايهتموا باراء غيرهم 

- يحبوا يخرجوا عن الشيء المعتاد حوليهم حتى لو باضافات بسيطة

- و يميلوا لتجربة لبس حضارات العالم والفترات الزمنية المختلفة دون تردد

فـ بالتالي نلاقيهم يجربوا كل شيء و غالبا جرائتهم تطلع باختياراتهم لملابس المناسبات اكثر .

 : Style Icons 

Lady Gaga - Rihanna - Rita Ora - Nicki Minaj 

[ Edgy or Rocker Chic   | أناقة الروك و خارجين عن المألوف  ]

يتصفوا غالبا بـ : جدي - مستقل - غامض - قوي الشخصية - متحضر

- حياته مليئة بالخفايا و الاسرار لغموضه - غالبا مايكون غير اجتماعي والأصدقاء معدودين جداً .

يتميز هذا المظهر بـ : يميلوا الى الالوان الغامقة او البارزة جداً مثل الاحمر و المعدنيات 

- يميلوا ايضا للاقمشة المتمددة تاخذ شكل الجسم مثل القطنيات او القاسية جدا مثل الجلد 

- يحبوا التصاميم ذات القصات الحادة و الاكسسوارات بتصاميم غريبة

وتكون الاكسسوارات ماخذة جزء كبير من اطلالتهم .

 : Style Icons

Rooney Mara - Gwen Stefani - Kristen Stewart - Taylor Momsen

[   Modern Or Fashion-Forward  |  عصري و يتبع اخر صيحات الموضة  ]

يتصفوا غالبا بـ : متجدد - جريء - قابل للتكيف - متحضر- متقلب - ملول .

يتميز هذا المظهر بـ : يحبوا اللعب بالالوان و الاقمشة سواء بخامات او طبعات

- يهتموا بالأكسسوارات مثل القلائد و الاحذية , يتبع اخر صيحات الموضة

 ولكن ليس الى درجة المخاطرة مثل " Eccentric " ستايل .

 : Style Icons

Demi Moore -  Madonna -  Christina Aguilera - Sarah Jessica Parker 

[   Preppy  |  المهندم برسمية  ]

الستايل البريبي معناه مأخوذ من المدارس الأعدادية الخاصة  "Preparatory Schools " 

الي يتميزوا باللباس الموحد المهندم الرسمي  , لكن في عالم الفاشن صاروا يستخدموا مصطلح "preppy " كأختصار .

يتصفوا غالبا بـ : لايحب التغيير بسهوله - مثقف - هادئ - عصامي - صبور

- ثابت بالأراء و المعتقدات - وقر.

يتميز هذا المظهر بـ : يميلوا الى الاقمشة السميكة و المقلمة و التويد

- و القصات الحادة  الكلاسيكية بالملابس - يميلوا الى الألوان الغامقة و المحايدة

- غالبا يهتموا بالحقائب و الاحذية بتصاميم كلاسيكية مثل حذاء اكسفورد و حقيبة الساتشل

وان تكون بالوان متناسقة مع ملابسهم ليست بالوان فاقعه و لايميلوا كثيرا للاحذية

 المفتوحة او العاليه جدا ممكن يميلوا الى الفلاتات البلارينا واللوفر كتغيير

 لانها غير مفتوحة و بتصاميم كلاسيكية

- غالبا اختياراتهم في الملابس مثل قمصان البولو و البلوفرات و الكارديجان

 و الترانش كوت و البدلات الرسمية او الزي الموحد و تنانير بقصة الـ A او البنسل 

 يعني اجمالا حتى لو غيروا يميلوا الى ستايل السعبينات بعض الشيء حتى بالالوان.

 : Style Icons

Alexa Chung - Emma Watson - Olivia Palermo - Taylor swift

[ طريقة ممتعة راح تسهل عليكم معرفة استايلكم  ]

حطي من الستايلات الي ذكرتهم وحسيتي انك مايله لها اكثر حتى لوكانت اكثر من 5
 و الي تحسيها مستحيل يكون ستايلك لاتحطي ابداً
 و اعطي كل ستايل نسبة بالي تحسي فعلا ينطبق على " شخصيتك - ذوقك باللبس - و ميولك .. الخ " 
و بعدها اسالي الي حوالينك عن النسب الي حطيتيها هل هم متفقين معاك ولالا
واعرفي السبب عشان الاجابات راح تساعدك كثير 
ومن النتائج راح تشوفي ستايلك ايش بكل بساطه و عادي جدا يطلع لك اكثر من ستايل يعبر عنك  .

*  هذا مثال من تجربتي عشان تبان الفكرة اكثر :

50% = Bohemian

Edgy / Rocker Chic = 50%

 Dramatic / Bombshell  = 50%

 Modern / Fashion-Forward = 50%

 Sporty/Casual = 20%

النتيجة = ان ستايلي متنوع بين الـ " بوهيمي - روك و ايدجي - مودرن  - درامي "

و احيانا كاجوال و سبورتي 

يعني باختصار احب التغيير و ماعندي حل وسط زي شخصيتي تماما لوول XD

[  Celebrity Style  ]

 راح اذكر يعض النجمات الي يتميزوا بأكثر من ستايل كـ امثلة

تثبت ان كل انسان له اكثر من ستايل  :

طبعا كلنا نتفق ان 80% من النجمات الأجنبيات عندهم ستايلست متخصصين 

لكن اكيد كخبير مظهر ماراح يقولبها زي الباربي لان لامحالة باي وقت خصوصا

 بالايام العادية تخرب كل شيء  , عشان كذا نميز الستايلست الشاطر من الي مو شاطر 

من خلال هالنقطة هل نشوف في ترابط بستايل النجمة

 تحت الاضواء وخارجها ولالا ؟!

اذا كان الجواب ايوا في ترابط يعني نجح ربط ستايلها مع شخصيتها 

, اما اذا لاء للأسف فشل بكل جدارة .

 Taylor swift  

اذا لاحظنا تتميز بـ ستايلين غالباً بصورها اليومية اما تكون بستايل  Preppy او Ladylike 

و لها ستايل ثالث في الحفلات Dramatic وتحب تجذب الانظار لها خلال الحفلات 

فـ بالتالي نلاحظ الي يميزها ان تحب تبين انوثتها بطريقة فنتج نوعاً 

و بنفس الوقت الستايلات من النوع المريح بالملابس وجذاب .

 Cara Delevingne 

كارا اتميزت بثلاثة ستايلات اتميزت فيهم Sporty و Rocker Chic

و نلاحظ بالمناسبات تميل اكثر لستايل Edgy بقصات و الوان ملابسها .

 Selena Gomez 

اتنوعت ستايلات سيلينا اليومية بين Bohemian 

و Rocker Chic اما بالمناسبات نلاحظ تميل جدا لستايل الـ Dramatic 

 Nicole Richie 

نيكول اتميزت بالستايل الـ  Bohemian  و Modern 

و صارت تعتمد بالاوان الاخيرة ستايل Minimalist  .

’ انا طلع لي اكثر من ستايل , هل ممكن الشخص يمتلك اكثر من ستايل ؟!

من الطبيعي جداً و من الي يفضل من قبل الخبراء ايضاً انو يكون للشخص
 تنوع بالستايل عشان يبتعد عن الرتابة او الملل
يعني بقولها بطريقتي لاتحطوا نفسكم في بوكس مستحيل تخرجوا عنو
 لان شيء يقتل المتعة باطلالتك
 ولو لاحظتو بعض الستايلات تشترك بصفات الاشخاص الي يميلوا لها ,
 و الانسان بطبيعتوا لو جوانب عديدة بشخصيتوا يعني مستحيل تلاقوا شخص
دايما صارم و رسمي  الا ما تلاقوا بالبيت يضحك و يبتعد عن الرسمية  
فـ الفكرة نفسها تماماً بتنوع الستايلات .

و كمان مهما اختلفت الستايلات الا ما الاغلبيه تضطر تختار ستايل مشترك 

لغرض العمل او الدراسة او لانو موضة !

مثل الستايل الكلاسيك الي هوا اساس الستايلات و المرجع للجميع

عشان نوحي بصورة للغير اننا نحترم المكان و الزمان باللبس 

فـ نحصل نفسنا بمقابله عمل او زيارة لكبار السن قلبنا للكلاسيك

مهما كان ستايل الشخص غير تقليدي .

و اذا لاحظتوا مع هالستايلات المتنوعة ذكرت معاها تعريف الشخصيات الي تميل لها بالاغلب

, بس نلاحظ بعالم الفاشن متعمقين جدا تحت كل ستايل معطينوا اكثر من مسمى

بس لو رجعتوا شفتوا الستايل بالنهاية واحد او مثلا ستايل يدمج بين ستايلين مختلفين او اكثر 

مثل " tomboy " يدمج بين البريبي ستايل و الرياضي و الروك 

فـ بدال مايقولوا كل هذا الشخص يدمج بين ستايل بريبي و سبورتي و روك

 اختصروها بمصطلح " tomboy " فـ يقولوا هذا الشخص ستايله توم بوي 

* ولا يعني توم بوي يعني خلاص البنت بوية بس هي نوع باللبس *

فـ بالنهاية : عادي جدا اذا كنتِ انسانه تحبي تجربي كل يوم ستايل لأني اعترف انا من هالأشخاص 

و كنت احسب ان ماليا ستايل وماليا شيء يميزني بس سبحان الله تنوعي بالستايل

 كشف 70% من شخصيتي للناس

لان لما سألت الاغلبية  ايش الستايل الي يميزني اتفقوا ان اكثر من ستايل لايق عليا

 و اوحى لهم  اني انسانه اكرهه الروتين و احب التغيير و المغامرة و اني صريحة

لان الالوان الي البسها مرا يعبر عن مزاجي و هذا فعلا شفتوا يعكسني بطريقة صحيحة 

فـ بالتالي تنوعي بالستايلات كانت فعليا تعبر عن مين انا للناس قبل ماتكلم

و الأهم مو عشان اليوم طلع لك ستايل كلاسيك راح تجلسي طول عمرك كلاسيك ماراح تغيري

في ناس تتغير ظروف حياتها و العوامل المؤثرة عليها  فتتغير طريقة تفكيرها و شخصيتها 

و هالشيء ايضا ياثر تأثير قوي جدا على ستايله يعني عادي جدا

 وتحصل ان الواحد يتغير ستايله 180%

بس بالنهايه زي ماقلت بأول التدوينة ستايلك مرآة عاكسة عن مابداخلك بكل بساطة 

فـ احرصوا على اختيار الصحيح الي يعبر عنك صح  .

لاتنسوا تتابعوا مدونتي على Bloglovin

عشان يوصلكم اخر التدوينات و تكونوا معايا اول باول  أضغطِ هــنـــا 

The End

و تابعوني على  | Follow Me :

[      ]