زي مانعرف دائما المناسبات المهمة من ضمنها العيد نحب نطلع بأجمل اطلالة لنا سواء بتغيير لوك جديد او من خلال تنسيقك لإطلالتك بشكل يجملك و يهبر الي حولكفي هذه التدوينة راح يكون مرجع للجميع لكل مناسبة مهمة سواء الاعياد او الحفلات بشكل عام
لأنها تحتوي على نصائح وافكار لطريقة تنسيقك لإطلالتك او اختيار المكياج المناسب لكالنصائح و الافكار راح تكون بشكل عام عشان تناسب الجميع ان شاء الله وراح تكون مقسمة على " الملابس , المكياج , الإكسسوارات "
بسم الله الرحمن الرحيم
السلام عليكم ورحمة الله وبركاته
مسائكم / صباحكم
[ ياسمين ]
باقي يومين تفصلنا عن العيد و ربي يعيدها علينا جميعاً
و كل سنة و انتوا طيبين قبل الزحمة
زي مانعرف دائما المناسبات المهمة من ضمنها العيد نحب نطلع بأجمل اطلالة لنا
سواء بتغيير لوك جديد او من خلال تنسيقك لإطلالتك بشكل يجملك و يهبر الي حولك
في هذه التدوينة راح يكون مرجع للجميع لكل مناسبة مهمة سواء الاعياد او الحفلات بشكل عام
لأنها تحتوي على نصائح وافكار لطريقة تنسيقك لإطلالتك او اختيار المكياج المناسب لك
النصائح و الافكار راح تكون بشكل عام عشان تناسب الجميع ان شاء الله
وراح تكون التدوينة مقسمة على :
" الملابس - المكياج - الإكسسوارات - اناقة المراهقات
- احصلي على الالهام - تنسيقاتي "
’لاتنسوا تشوفوا التدوينات السابقة من سلسلة " آخر إتجاهات الموضة " :
|[ الـمـلابـس / Clothe's ]|
• مو لازم ملابس العيد تكون غالية زي مابلاحظ البعض يدفع دم قلبو عليه
ا اما باقي الملابس عادي !! مرا غلط الفكرة هذه خصوصا لو انتِ عارف
ة ما عندك الحرية الكاملة بالميزانية الي بيدك
و حتى على افتراض لو كنتِ مرتاحة مادياً وربي يزيدك بس الذكاء
بالشراء واحد سواء كنتِ غنية او لا !
دائما حاولوا القطع الي عليها القيمة تكون بالإكسسوارات
او بملابس شويا كلاسيك او عارفه انك راح تلبسي كم مره
لان عارفة اغلبكم يشتري ملابس العيد ومعد يرجع يلبسها بس يخلص العيد خصوصا
لما يكون فستان صعب شوي تجددي او يكون صرعة مؤقتة و صعب ترجعي تلبسي ثاني مره فـ حاولوا تخلوا هالنوعية من القطع ناعمة عشان تستثمريها بكم طلة .
• زي مانعرف موضة المونوكروم " طلة الأسود والأبيض " دارجة
و اقرب مايكون شيء كلاسيكي و له مكانه بكل سنة
لكن غالبا بعض الطلات تقلب رسمية ومملة جداً للبعض و يخاف يعتمدها بالمناسبات
, افضل حل لكسر هاللونين انك تضيفي من خلال الاكسسوار و الميك اب
لون بارز و زاهي راح يعطي طلتك روح اكثر و تميز .
• افضل طريقة ممكن تساعدك على تسهيل تنسيق اطلالتك من خلال
اختيارك لقطعة وحدة اساسية يعني تكون هيا اساس او نجم الطلة
مثلا تنورة مطبعة و اكيد يرجع اختيارك للقطعة الاساسية
لشكل جسمك اكيد على فرضا ان عندك امتلاء بالجزء السفلي خلي قطعتك المميزة بالجزء العلوي
و تقدروا تخلوا قطعتكم المميزة عقد او حلق او جزمة مو شرط تكون ملابس .
• مازال للان في مننا لسى تبحث عن الامان في ملابسها قبل أي شيء اخر
و مو بالضرورة يكون هالشيء بمصلحتك و لا ملزمة بالمخاطرة لحد يخرب توازن
جسمك و تحسي بعدم الراحة بطلتك الاثنين الاخيرة مطلوبين اكيد
بس حاولي دائما بالمناسبات الكبيرة تكون لك طلة غيرعن لبسك المعتاد
, لو حسيتي ان صعب تغيري 100% كل طلتك
مو مشكلة ابدائي بالاكسسوار الملون او بتصاميم جريئة و شويا شويا
راح تتجرأي بالتنسيق لطلة كاملة باشياء مو متعودة عليها
بس الاكيد لازم تعرفي شكل جسمك قبل تتخذي أي خطوة للتغير .
• مين قال ان ملابس العيد مقتصرة فقط على التنانير و الفساتين !
مو الكل يناسبة التنانير و الفساتين سواء بسبب ستايلك السبورتي او بسبب نظام عيدك ككل
, لكن مايعني ابدا ان تفتحي المجال لأي بنطلون يتلبس خصوصا الجينز
عارفة في لوكات جيدة للعيد بالجينز و ممكن شيء عادي تلبسي لو كان عيدك خفيف جدا
بس لو حابة تعتمدي البنطلون بإطلالتك و عيدك شويا كبير
اعتمدي البناطيل الواسعة الي دارجة موضة
او حتى البناطيل الرسمية او الي بشكل عام بخامات واقفة و تعطي فخامة لك .
• اذا ملابسك كانت مليانه تفاصيل من ناحية التصميم او القماش نفسه ابتعدي تماماً
عن الإكسسوارات الضخمة و الكثيرة , عارفة انها موضة تكثير الاكسسوار
لكن مو مع أي شيء عشان لا يعطي منظر اوفر لطلتك
, وعلى فكرة احيانا الإكسسوارات اللماعة زي الذهب و الفض
ة او غيرها كثرتها ترخص الطلة * يعني تضيعي قيمة الي لابستوا ببساطة * وتخربها .
|[ الأكسسوارات / Accessorie's ]|
عارفة الكل يأزم وقت ماتجي على الأكسسوارات و كل ماكانت الملابس
بتصاميم غريبة زاد هالشيء صعوبة تنسيق الاكسسوار معاها
, هذه بعض النصائح او افكار تساعدك على اختيار الاكسسوار و تنسيقة مع الملابس:
• زي مايكون الحذاء قطعة اساسية ومكملة للطلة فـ الشنطة كمان لها نفس الاهمية تماماً
و اختيار الشنطة الي تليق مع اطلالتك ترجع للمناسبة وقتها و مكانها
يعني لو كان عيدك زيارات بالعباية حاولي شنطتك تكون بتصميم جذاب
لكن مو كبيرة بالحجم اكيد , اما لو كنتِ رايحة سهره اكيد افضل خيار هوا الكلتش .
• ابسط طريقة لأختيار الشنطة و الشوز هوا انك تنسيقهم بنفس اللون او التصميم
و هي طريقة راح تفك ازمة خصوصا للي ملابسها كله شغل او طبعات .
• الكعب العالي الي هوس البعض منا و رعب للبعض كمان
, دائما اشوف كلام لاصق للكعب انو مؤلم !
ترا الكعب اطوال و انواع بالحجم اختاري للي يناسبك و الي يريحك اكيد
مو شرط تلبسي كعب مرا عالي ولا شرط تلبسي كعب مرا واطي الوسط مرا مناسب للكل
, و اهم شيء تجربي قبل الشراء ترا في بعض الموديلات ناطحة سحاب
زي مايقول البعض لكن مريحة لطريقة تصميمها
فـ خلو الكعب صديقكم الصدوق صدوقني راح يبرز قوامكم باجمل صورة
خصوصا مع الفساتين و التنانير بشكل عام .
• لو كان ملابسك بالوان قوية زي الاحمر , البرتقالي , الاصفر .. حاولي تختاري
الاكسسوارات الناعمة جدا و اقرب لان تكون خاليه من التفاصيل .
• ماينفع تلبسي الاكسسوار في اذنك و رقبتك و يدك و رجلك مع بعض كذا مرا اوفر
باختصار لو لبستي خاتم كبير او خواتم صغيرة مع بعض حاولي
تكون الاسورة ناعمة جدا او العكس تماماً
, و اختاري بين الحلق الكبير او عقد كبير الاثنين مايليقوا على بعض مرا اوفر
خصوصا لو رقبتك قصيرة كمان كارثة !
• زي مانعرف كثير منا في عاداتهم وتقاليدهم نقش الايد بالحنة
لكن للاسف دائما اشوف اغلاط تتعمل كل مره و هي :
- لما تنقشي ايدك بالحنة حاولي ماتكتري بالاكسسوار بيدك
يعني المنظر يقلب اوفر بشكل عجيب و يخفي جمال النقش !
- حاولي ماتحطي الوان مناكير قوية مثل البرتقالي , الاصفر , الاخضر
راح يقلل من جمالية ايدك اولا و من جمالية الحنا ثانيا فلازم تنتبهوا .
• اختاري الوان الاكسسوار من التفاصيل الصغيرة بملابسك
مثلا من كبك البلوزة باللون الذهبي خلي اكسسوارك ذهبي و هكذا
, حتى لما يكون الملابس مطبعة اختاري اكثر لون مو بارز او مكرر
بالقطعة بشكل كبير و اختاري لون لاكسسوارك .
• دائما لما تحتاري باختيار اللون الاكسسوار خصوصا لما يكون لبسك
مليان الوان او طبعات عندك
هذي الخيارات الذهبية و الي تعتبر خيارات مثالية هما :
[ الاحجار الكريمة بدرجات الابيض او حجر الكريستال ,
الذهبي , النحاسي , الفضي , اللؤلؤ , الالماس او حجر الزركون كبديل ارخص ]
• في قاعدة مشهورة بالتنسيق هي " القميص و الحذاء باللون نفسه "
وتعتبر من القواعد السهله جدا و الموفقة
خصوصا لما تنسقي الشوز مع الجزء العلوي سواء اكسسوار او القميص
او حتى الطبعة الي ع القميص و دي الطريقة تفك ازمة بالنسبة ليا .
• الخيارات المثالية لألوان الاحذية الي مفروض تكون من اساسيات دولابك
وراح تليق مع اغلب الالوان هي :
الابيض , النود أو البيج , درجات الاحمر بما يناسب بشرتك , الاسود .
• لما تعتمدي الطلة اسود X اسود حاولي تبدعي بالأكسسوار خصوصا لما تكون
لمناسبة خلي الأكسسوار بتصاميم فخمة عشان ماتقلل من طلتك
انها ماتناسب المناسبة و افضل اكسسوار هوا البروش , والي ماتروح موضته ابداً .
• لو كان شعرك بويش او قصير او مرفوع خصوصا لما تكون السلسلة مرا ناعمة
حاولي تلبسي الحلقان المميزة بالتصميم و الاحجام الكبيرة
عشان مايبان عند منطقة الرقبة فراغ كان شيء ناقص
, لكن انتبهوا لصاحبات طول الرقبة القصيرة لاتبالغي بحجم الحلقان او طولها
عشان مايبين ان رقبتك جدا قصيرة .
|[ الـمـكـيـاج / Make-up ]|
زي ماقلت قبل التفاصيل بطلتنا مهمة لان تكمل بعضها والمكياج
مايقل اهميةعن أي شيء ثاني في اطلالتك , عشان كذا خصصت لو جزئية بالتدوينة:
• دائما الخبراء يذكروا ضرورة الابتعاد عن تنسيق الالوان القوية مع بعض
بطلة واحدة او باللوك ميك اب واحد , و الافضل ان نبرز لون واحد فقط
خصوصا بالميك اب مثلا لون روج احمر و الظلال بدرجات هادية
عشان ماتشتت النظر لك و ممكن هالشيء يضر بمدى تاثيرها
على لون بشرتك ويفقدها الرونق المرغوب من الكل
, وطبعا نفس الكلام ساري ع الملابس و الاكسسوار
كل ماكانت ملابسك هادية البسي اكسسوار بالوان زاهية او العكس .
• لو كان ملابسك بالوان قوية و بارزة حاولي تعتمدي بالميك اب الوان طبيعية
بدرجات الترابية و الروج بالوان هادية .
• لبسك جدا ناعم اعتمدي مكياج فيلو جراءة وحركة مثل الظل الدخاني
, لون الروج الفاقع او البارز .
• لو كان ملابس بالوان المعدنية الي دارجة موضة حاولي المكياج لايمت بصلة بالمعدني و اختاري النوعية المطفية .
• اكثر طلة تناسب كل اللوكات هي انك تعتمدي ظل العيون قريب من لون بشرتك
مع رسمة أي لاينرعشان تبرز العين و الروج بدرجات الاحمر او الوردي الغامق
بما يتناسب مع بشرتك و اكيد ماننسى اهمية الكونتور كمان .
• الاظافر مرا مهمة و احس كثير للاسف مهملين هالنقطة
, او مهتمين بس يغلطوا بالالوان الي ماتليق مع الملابس
دائما لما يكون اطلالتك رسمية و تبع سهره حاولي ماتختاري الوان
زي السماوي و الاصفر لان يعتبر نشاز مع للوك تبعك
خصوصا لو كان عمرك اكبر من الـ 35 سنة!
• افضل الوان المناكير الي يعتبروها الخبراء تفك ازمة وخيار مثالي
لاغلب اللوكات او في حال احترتي هما :
[ اللون النيود , درجات الاحمر او العودي , الفرنش مناكير ] .
• لو كنتِ تحبي الرسمات ع الاظافر و الستيكرات بالنقشات افضل شيء
انك تنعمي او تبسطي باللوك تبعك مثلا لو كانت زياراتك بالعيد اغلبها بالعباية
او ستايلك نعوم وحابة تكسري هالشيء عن طريق الوان اظافرك مرا ينفع هنا
, طبعا هذا يعني ان كل ماكان ملابسك فيها الوان او نقشات بزيادة بسطي بالمناكير قد ماتقدري .
• زي مانعرف رجع موضة ان نلبس كل القطع بلون واحد او بتدرج اللون واحد
لكن هذا مايعني ابداً ان نطبق هالشيء مع المكياج فلازم نشيل هالفكرة من راسنا .
• لما تختاري طلتك بالوان حيادية حاولي تعطي روح بمكياجك
مثلا روج بدرجات الوردي و الاحمر و لما تختاري الوان غامقة في ملابسك
ابتعدي تماما عن هالشيء بمكياجك و ظلال العيون خاصة
لان باختصار راح يقلب شكلك " goth look " و كئيب جدا كانك مصاصة دماء !
|[ أنـاقـة الـمراهـقـات ]|
عارفة اصعب عمر و اكثر عمر مظلوم بالملابس و المساعدات من ناحية الطلات
وممكن أي شيء يكبرهم 10 سنين او أي شيء يطلع شكل جسمهم غلط خصوصا
انهم بفترة البلوغ , و هذه بعض النصائح الي ان شاءالله راح تساعدكم :
• حاولي تختاري قطع بتصاميم ناعمة و العبي بالاكسسوارات و لون المناكير .
• المكياج مو بدري عليكي لكن ماراح يليق عليكي الاوفر اعتمدي
الطلة الناعمة و ابتعدي عن الارواج الغامقة .
• مو شرط انك تلبسي كعب عالي خصوصا لو مو متعودة عليه
و لا شرط تعتمدي اعتماد كلي ع الفلات
في شوزات يكون الكعب حقها قصير وراح يناسبك خصوصا للسهرات
اما بالصباح اعتمدي الصنادل و غيري عن الفلاتات .
• الالوان الفاتحة و البارزة بعمرك هي لعبتك خليكي دايما فرايحية
بالطلات الصباحية و انيقة بفخامة و بساطة بالسهرات ولا تقلدي نجمات اكبر منك .
• الكل عندو فستان اسود او ابيض سادة بدون تفاصيل كثير
, تقدري من خلال هالقطعه الوحدة تطلعي باكثر من طلتين مثلا :
عندك فستان ابيض لطلة صباحية نسقي عليه بليزر بالوان فاتحة لنفترض سماوي
و الاكسسوار ذهبي و الفلات او الصندل معدني ذهبي طلة صباحية تناسب العيد
اما بالليل نفس الفستان لكن مع حزام فضي او حزام مطرز او حزام بالاحجار الكريمة
و باقي الاكسسوار فضي و صندل بيج طلة انيقة و فخمة جداً .
• تساريح الشعر الي تناسبك هي الناعمة و ابتعدي عن البف
و التساريح الغريبة و الكبيرة بالسهرات حتى لو كانت موضة
, اما تعملي ذيل حصان بغرة او بدون او تخلي ويفي و تزيني شعرك باالإكسسوار
لو ملابسك ناعمة طلة ولا اجمل و اكسسوارات الشعر مرا موضة .
كثير منا و انا اولكم تجينا لحظات نفسنا نجرب شيء جديد فنقوم نعمل بحث
عن ستايلات او ثيم مختلفة عشان نقدر ناخذ صورة اوضح و نعرف ايش نبى بالزبط
و هذه بعض النصائح من تجاربي الي راح تساعدكم ان شاءالله و تسهل عليكم البحث:
• اول شيء مو كل تنسيق تشوفي حتى على فاشينستا قد الدنيا ممكن يليق لك
سواء لجسمك او حتى لشخصيتك و المناسبة
, فـ حطو ببالكم ان في قابلية كبيرة للتعديل بما يتناسب مع جسمك و المناسبة اهم شيء .
• عجبك تنسيق و حابة تطبقي بما يتوفر عندك مرا سهله اقل شيء انك تنسقي
نفس توزيع الالوان باللوك الي عاجبك او اقلها بقطع مشابهه لها لكن بقطع متوفرة عندك
زي سلسلة " Get the look " الي معروفة بكل مجلة تهتم بالموضة .
• دائما اتفرجي على تنسيقات غيرك لان هذا الشيء راح يغذي افكارك
و راح ترتاحي اكثر مثلا عجبك طريقة لبس فلانه لتنورة كلوش
و بنفس الوقت نفسك تنسقي مع شيء اجمل بوجهه نظرك
راح يطلع بالنهاية معاكي لوك من غير مساعدة من احد .
• بالاخير هذه بعض المواقع الي راح تساعدكم باخذ افكار تستوحوا منها طلات
تناسبكم للمناسبات او اللبس الكاجوال بشكل عام
و الجميل صار فيها ميزة البحث عن طريق اختيارك للقطعة
الي حابة تبحثي عنها و لونها مرا شيء ممتاز
|[ Eid Outfits ]|
وصلنا لأخر جزئية و هي عرض 2 من تنسيقاتي للعيد
و راعيت يكونوا واحد للصباح , واحد للمساء
طبعاً اول مرا اجرب هالنوع من تصوير الملابس بطريقة الفلات
لذلك استروا على مواجهتم لأول تجربة
, ومعليش بعد ماصورت اكتشفت اني مايلة للأسود و الأحمر لوول
ان شاءالله تعجبكم التنسيقات و راح اكتب التفاصيل تحت كل صورة :
Outfit Details
Blouse: Bershka
Skirt: H & M
Shoes: call it spring
All accessories: H & M
Outfit Details
Dress: River Island
Shoes: call it spring
Accessories: From Indian shop
" بالنسبة للأكسسوار الهندي اشتريتوا طقم كامل من محل هندي بوسط البلد , تقدروا تحصلوهم عند اي محل هندي "
The End
و تابعوني على | Follow Me :
[ 
]
]
4 comments
جميل :)
لكن اظن لو بدل التنورة بنطلون واسع بنفس الطول او أطول شوية راح يكون أجمل ❤️
مدونتك تفتح النفس ومفيدة جدا، صار خاطري أتسوق معاكي :) ❤️
صحيح انا عندي بنطلون اسود واسع و قيد لبسته بنفس الي قلتيه وطالع جميل
لكن حبيت اجرب شيء تاني , و سعيدة جداً بتواجدك ياجميلة و اكيد راح اكون اسعد لو تسوقنا سوا ^^
لاتحرميني من طلتك ياجميلة
ما شاء الله اللبس تحفه تتهني فيه ان شاء الله و البوست كله معلومات مفيده يعطيكي العافيه
http://3beautymarks.blogspot.com/
حبيبتي ربي يعافيكي
وسعيده ان التدوينة عجبتك
مانحرم من اطلالتك الجميله
XOXO
Post a Comment